«Korintliqlargha yëzilghan birinchi xet»(Qisqiche chüshendürüsh) Bu xetning mu’ellipi elchi Pawlustur. U Korint shehiridiki ëtiqadchilar jama’etchilikide yüz bergen turmush we ëtiqadqa munasiwetlik mesililerni hel qilish üchün bu xetni yazghan. Pawlus ikkinchi qëtimliq xizmet sepiride Korint shehirige bërip, bu yerde xush xewer tarqitish we telim bërish üchün bir yërim yil turghan («Elchiler» 18-bab 1-ayettin 18-ayetkiche). Eyni waqitta Korint shehiri (bügünki Grëtsiyide) Rim impëriyisige tewe Yunan ölkisining merkizi bolup, soda-sana’et, medeniyet tereqqiy qilghan, shuning bilen birge exlaqsizliq ewj alghan we xilmuxil diniy tüs qaplighan sheher idi. Shu sewebtin, bezi ëtiqadchilar melum derijide bu sheherning tesirige uchrighan bolup, ularning arisida jinsiy exlaqsizliq we bashqa qalaymiqanchiliqlarmu körülgen. Ular nikah mesilisi we butqa atap nezir qilinghan göshni yëyish yaki yëmeslik mesililirini otturigha qoyghan hemde Pawlustin Muqeddes Roh ata qilghan hediyiler we ölümdin tirilish toghruluq so’allarni sorighan. Pawlus Muqeddes Rohning ilhami bilen bu xëtide ulargha Eysa Mesih toghrisidiki xush xewerning bu mesililerge qandaq jawab bëridighanliqini körsetken. Tëzis: 1. Du’ayisalam (1-bab 1-ayettin 9-ayetkiche) 2. Ëtiqadchilar jama’etchiliki ichidiki bölünüshler (1-bab 10-ayettin 4-babning axirighiche) 3. Exlaqsizliq we dewalar (5-, 6-bablar) 4. Nikah mesililiri (7-bab) 5. Ëtiqadchilarning turmushi we ibaditi (8-babtin 14-babqiche) 6. Eysa Mesihning tirilishi we ölgenlerning tirilishi (15-bab) 7. Yehudiyidiki ëtiqadchilar üchün i’ane toplash (16-bab 1-ayettin 4-ayetkiche) 8. Axirqi sözler (16-bab 5-ayettin 24-ayetkiche) |
||
